Kikosi cha nne cha polisi wa Kenya kiliondoka nchini Alhamisi kuelekea mji mkuu wa Haiti, Port-au-Prince, ili kujiunga na maafisa wenzao wanaoshiriki katika Misheni ya Usaidizi wa Usalama wa Kimataifa (MSS) katika taifa hilo la Karibea.
Waziri wa Mambo ya Ndani, Kipchumba Murkomen, aliwaaga maafisa hao katika Uwanja wa Ndege wa Kimataifa wa Jomo Kenyatta (JKIA).
Akizungumza wakati wa hafla hiyo, Murkomen alisisitiza kuwa Umoja wa Mataifa unaunga mkono kikamilifu operesheni ya MSS na kueleza imani yake katika uwezo wa maafisa hao kutekeleza majukumu yao ipasavyo kwa ajili ya kulinda usalama wa Haiti.
Katibu Mkuu wa Usalama wa Ndani na Utawala wa Kitaifa, Dkt. Raymond Omollo, aliwatia moyo maafisa hao akisema kuwa misheni hiyo siyo jambo lisilowezekana. Alibainisha kuwa wale waliotangulia tayari wameonyesha uwezo wa vikosi vya Kenya na mchango wao katika usalama wa Haiti.
Aliwahimiza maafisa hao kutekeleza majukumu yao kwa bidii, si kwa ajili ya Kenya pekee, bali kwa manufaa ya ubinadamu kwa jumla.
Kwa upande wake, Inspekta Jenerali wa Polisi, Douglas Kanja, alisema kuwa maafisa hao wa ziada wataendelea kushirikiana kwa karibu na Polisi wa Kitaifa wa Haiti pamoja na vikosi vingine vya MSSM.
Maafisa hao wa kipekee wametoka katika vitengo mbalimbali vya Huduma ya Kitaifa ya Polisi (NPS) na wataungana na vikosi vilivyotumwa mwaka jana na awali mwaka huu katika misheni hiyo inayoongozwa na Kenya.
Kwa sasa, misheni hiyo inajumuisha maafisa kutoka mataifa kama Jamaica, Guatemala, El Salvador, Bahamas, na Belize.
Wakati wa kuwaaga maafisa hao, viongozi wengine waliokuwepo ni pamoja na Katibu Mkuu wa Masuala ya Kigeni na Diaspora, Korir Sing’oei, Mshauri wa Usalama wa Taifa, Balozi Monica Juma, Balozi wa Kenya nchini Haiti, Noor Gabow, Naibu Mshauri wa Usalama wa Taifa na aliyekuwa Inspekta Jenerali wa Polisi, Joseph Boinnet, Afisa Mkuu wa Uendeshaji wa Kenya Airways, Kamal George, pamoja na maafisa wengine waandamizi wa polisi.